語言呢個生命體︰粵文我見

「語言是活的」呢句說話，已經唔記得咗係邊個同我講嘅；咁如果要討論粵文，呢篇文不如就用廣東話嚟表達啦？（好啦我準備好獻出我嘅第一次喇[1]）

「語言係生勾勾嘅」呢個概念，一直都烙印喺我腦海裡面。即係點呢？即係話一個活生生嘅語言，就好似廣東話咁，每時每刻都會有好多人用緊講緊；而只要一種語言一日仲有人用緊，佢就會好似有生命咁，因著各種原因而變化。例如係「創造」、「口誤手誤」、「以訛傳訛」、「約定俗成」、「借用外來語」之類咁；除非一種語言已經死左，好似拉丁文咁，無人會再用佢嚟做日常使用嘅母語，咁一種語言先至會唔再變化。

唔知由幾時開始，啲人好鍾意講「正字」，甚至為某啲廣東話嘅文字詞彙，去搵一個「正確」、「古字」寫法出嚟；例如話「啲」嘅正字應該寫做「尐」咁，我而家見到唔會嬲喇，只係覺得得啖笑。明明個「啲」字已經有一個約定俗成嘅寫法係大家都明白嘅，無論係咪有人有咁強論據去支持「尐」係古時用嘅正字都好，點解我哋要用一個（疑似係）古人嘅寫法去取代大家今日個個都睇得明嘅「啲」字？就好似一開頭咁講，每一種活生生嘅語言都係會隨住時間而變化嘅，點解要咁捉蟲，專登去搵「古字」去取代「現有寫法」？網絡上面傳左咁耐，有堆人跟左，但直到最近都仲有朋友問緊我「尐」係咩字…

點解古字就係「啱」，今時今日嘅俗寫就係「唔啱」？筆者嘅祖父輩就已經定居喺東南亞，叔叔喺當地出世而且一直留喺當地生活，所以可以話佢講嘅廣東話保留左百幾年前嘅發音用字。當筆者同叔叔用廣東話傾偈時，發現唔少口音相異，甚或有啲講法係我哋今日唔會再講。咁如果舊日傳統就係啱晒，我哋係咪要全部學呢啲舊日講法讀音？我哋係咪要睇返粵語長片去學「正音」？

一直都想寫低呢堆想法，但真正引起我想將呢堆「粵文我見」寫落嚟嘅，係網絡名人（？）方學能[2]喺面書上面分享咗一個問題︰究竟係「爛船都有三分釘」，還是「爛船都有三斤（根）釘」呢？個問題本身唔係最有趣嘅，對我來講更加得意嘅係大家對於選擇邊一個講法嘅「思考方法」。有人用一路以嚟嘅講法作準（傳統），搜尋引擎搵出嚟嘅結果數目支持（約定俗成？），有人按語意去分析，有人話其中一個講法係我哋嘅強鄰先會用嘅。

對筆者嚟講，「爛船都有三斤釘」呢個講法似乎係最合理嘅。上網搵過，大概嘅解釋係話以前嘅船多數用木造，咁金屬部份（釘）起返出嚟就以重量計咁。但係記憶中由細到大聽開嘅講法都係「爛船都有三分釘」，咁應該取邊個捨邊個？我諗我都係會繼續講「爛船都有三分釘」，始終呢個係我印象中最常用嘅講法；而語文同數理唔同，只要唔太離譜，好難論絕對嘅啱定錯，太過刻意去追求正音正字反而會顯得突兀。

諗返轉頭，強鄰常用嘅「三斤釘」好可能係最初嘅講法，而廣東話嘅「三分釘」則係後來嘅口誤。但好似生物嘅基因突變咁，有一種只出現喺某個族群嘅突變，科學家可以靠住呢個突變去搵返呢個族群嘅成員出嚟。某程度上呢個都可以作為一種身份認同，無話一定要邊個族群跟另一族群，香港人同強鄰都可以保持各自嘅講法。但筆者唔係話要專登去追求呢種「唔同」，或者過於高舉呢種唔同。好似近年又好多人強調「係『二奶』唔係『小三』」、「係『薯仔』唔係『土豆』」之類嘅倡導，喺筆者眼中係有少許白費氣力嘅。「借用外來語」或者「詞彙更替」都係一個自然發生嘅現象，好似日文中有大量嘅外來語，電視「テレビ(terebi)」由英文嘅 television 借返嚟，兼職「アルバイト (arubaito)」由德文借，但相似嘅情況喺廣東話出現嘅時候就會遭到一部份人極力排拒。

唔好忘記粵文同其他華文語言仲係用緊大致相同嘅文字集，詞彙嘅互相流通更加容易發生。語言呢個生命體係會自然地發展嘅；若想用個人意志去將趨勢扭轉，就好似阻止一棵植物朝向陽光生長一樣，只要條件仲喺度，就算剪左佢嘅葉佢都係會生翻出嚟一樣。比起小撮人嘅個人意志所產生嘅影響，集體意志更加會決定語言嘅走向。（頭盔︰唔代表我反對香港同強鄰區隔）

只係純論語言的話，文字嘅表達就算只係有好細微嘅差異都好，都係會影響意思嘅。好似筆者搵唔到一個華文詞彙可以表達到我心目中嘅「優しい yasashii」呢個意思，嚟到中文時呢個字多數會譯做「溫柔」，但日文會用「優しい」嚟形容男人，而中文又幾何會用「溫柔」嚟影容男人而唔洗擔心冒犯對方？又譬如我會用日文中嘅「代議士」嚟取代「議員」呢個較常用嘅詞彙，係因為我想強調「代議士」真係要「代」人民發聲嘅。久而久之，如果呢個「借用」開始多人受落就會普及，咁就係我所講嘅「語言嘅自然發展」喇。

講左咁多嘢，其實係想帶出一個問題︰究竟我哋係咪要咁拘泥於「正字」或「正寫」呢啲問題？既然語言係生勾勾兼且會變嘅，有時過份執著會唔會係矯枉過正？我唔係話廣東話或者粵文嘅保育唔重要，我知道並且佩服好多有心人做緊，做得好好。但呢啲嘢都只係為今時今日嘅粵文 take 咗一個 snapshot 作為歷史嘅證據，後世搵返嚟睇時，都一定唔會全跟我哋呢個時代講緊嘅廣東話版本。

既然語言係會變嘅，點解唔可以就咁按照佢今日嘅樣貌去接受佢？

[1] 今次應該係我第一次用廣東話出文
[2] 唔知應該點形容

圖︰Flickr by CC2.0  (Shut Up, take 3 by user "LaVladina")